کینیا میں شہید پاکستان کے ہر دلعزیز سینیئر صحافی او اینکر ارشد شریف کے اہلخانہ نے ان کا دوبارہ پوسٹمارٹم کرانے کا فیصلہ کیا ہے۔
تفصیلات کے مطابق دو روز قبل کینیا مین پولیس کی گولی سے شہید پاکستان کے ہر دلعزیز سینیئر صحافی اور اینکر ارشد شریف کا جسد خاکی وطن واپس آنے پر قومی پرچم میں لپیٹ کر اسپتال منتقل کردیا گیا ہے۔
ذرائع نے بتایا کہ ارشدشریف کا پوسٹ مارٹم پمز اسپتال میں کیا جائے گا، جس کے لیے سینیئر ڈاکٹرز پر مشتمل میڈیکل بورڈ تشکیل دیا جائیگا۔
ذرائع کے مطابق بورڈ سینئرمیڈیکولیگل آفیسر کی سربراہی میں تشکیل دیا جائے گا، جس میں مختلف شعبہ جات کے سینئر ڈاکٹرز شامل ہوں گے۔
شہید کی نماز جنازہ اور تدفین کل وفاقی دارالحکومت اسلام آباد میں ہوگی۔
ارشدشریف کی بیوہ نے اے آر وائی نیوز سے گفتگو کرتے ہوئے کہا ہے کہ مجھے کینیا کے صحافیوں نے بتایا ہے کہ ارشد شریف کو قتل کیا گیا ہے۔
جویریہ صدیق نے کہا کہ بتایا جائے کہ میرے شوہر کو ملک چھوڑنے پر کیوں مجبورکیا گیا، اگر آج ارشد شریف گیا ہے تو کل میری اور آپ کی باری ہے، قوم ارشد شریف کے لیے آواز اٹھائے۔
شہید کی بیوہ نے پاکستانی میڈیا سے یہ بھی اپیل کی کہ ہماری پرائیویسی کا خیال رکھا جائے، بچوں کی تصاویر نہ استعمال کریں، اس معاملے پر بڑوں سے بات کریں اور بڑوں کے انٹرویو کریں۔
