کراچی: وزیراعظم شہبازشریف نے کہا ہے کہ عمران خان کے اکسانے پرجتھوں نے فوجی تنصیبات پر حملے کئے، سازشوں کے تانے بانے سمندر پار تک تھے اور ہیں، سیاسی افراتفری کی وجہ سے پاکستان معاشی طور پر ترقی نہیں کرسکا۔
انہوں نے تقریب سے خطاب کرتے ہوئے کہا کہ وفاق میں اتحادی حکومت ملکر اگر مسائل کا سامنا نہ کرتے تو صورتحال مختلف ہوتی، لیکن باہمی اتفاق کا نتیجہ ہے کہ بڑے بڑے چیلنجز جن کا سیلاب یا آئی ایم ایف سے تعلق ہو، یا پھرجو سیاسی افراتفری پیدا کرنے کی مذموم کوشش کی گئی، 9مئی کے المناک واقعات پر اس کا اختتا م ہوا ۔
اتحادی جماعتوں کی باہمی مشاورت کے ساتھ ان تمام سازشوں کو دفن کردیا، سازشوں کے تانے بانے سمندر پار تک تھے اور ہیں۔
نام ای سی ایل میں ڈالنے پر حکومت کا شکریہ،میرا بیرون ملک سفر کرنے کا کوئی ارادہ نہیں
ان جتھوں نے عمران نیازی کے اکسانے پر فوجی تنصیبات پر حملے کئے۔ وہ تاریخ کا ایک سیاہ دن ہے۔ میں فوج اور پولیس کے شہداء کے ورثا سے ملا، دستاویز ڈاکیومنٹری دکھائی گئی ہر آنکھ اشکبار تھی کہ یہ قوم کے سپوت ہیں جنہوں نے برف پوش پہاڑوں ، میدانوں، ریگستانوں میں اپنی جانیں دے کر اپنے بچے یتیم کرکے قو م کے لاکھوں بچوں کو یتیم ہونے سے بچا لیا۔
شہداء کی یادرگاروں کو تباہ برباد کیا۔ سیاسی افراتفری کی وجہ سے پاکستان معاشی طور پر ترقی نہیں کرسکا۔شہبازشریف نے کہا کہ 9مئی کے واقعات پر سزاؤں پر کسی کو اعتراض نہیں ہونا چاہیے۔آج شہرقائد میں ہم 9مئی کے واقعات پر قائد کے سامنے سب شرمندہ ہیں، بڑے بڑے حادثے ہوئے مگر کسی لیڈر نے فوجی تنصیبات پر حملے کا نہیں کہا، ہمارے دورحکومت میں بڑے بڑے امتحانات آئے لیکن کسی نے نہیں کہا کہ جی ایچ کیو پر حملہ کردو۔
انہوں نے کہا کہ کے فور منصوبے کو فی الفور مکمل کرنا ایک چیلنج ہے۔ یقین دلاتا ہوں میرے لئے کے فور منصوبہ تمام منصوبوں سے اہم ہے۔ جو ہوگیا سو ہوگیا یقین دلاتا ہوں بجٹ میں کے فور کو ترجیح دوں گا، منصوبے کی تکمیل میں کوئی کوتاہی برداشت نہیں کی جائے گی۔انشاء اللہ سب مل کر پاکستان کو کھویا ہوا مقام دلائیں گے۔ پی ٹی آئی کی حکومت نے کراچی کو پانی نہ دے کر ظلم عظیم کیا، عمران خان نے کراچی کو پانی دینے پر کوئی توجہ نہیں دی۔