سینئر سیاستدان جہانگیرترین نے قریبی ساتھیوں کے مشورے پر نئی سیاسی پارٹی بنانے پر غور شروع کردیا۔
ذرئع کے مطابق جہانگیر ترین دوبارہ سیاست میں سرگرم ہوگئے، جہانگیر ترین اور ہم خیال دوستوں کی جانب سے نئی پارٹی کیلئے ابتدائی کام بھی مکمل کرلیا گیا۔
خیال رہے کہ عمران خان کی گرفتاری کیخلاف پرتشدد مظاہروں کے بعد تحریک انصاف کا فارورڈ گروپ بننے کا امکان ہے۔ جہانگیرترین سے ایک ہفتے کے دوران 20 سے زائد اہم سیاسی شخصیات ملاقاتیں کرچکی ہیں۔
ذرائع کے مطابق جہانگیر ترین اپنی نااہلی ختم کرانے کیلئے بھی متحرک ہوگئے ہیں، نااہلی ختم ہونے کے بعد جہانگیر ترین ملکی سیاست میں اہم کردار ادا کریں گے۔
واضح رہے کہ پاکستان تحریک انصاف کے چیئرمین عمران خان کی گرفتاری کے بعد پی ٹی آئی کے مشتعل کارکنوں نے پرتشدد احتجاج کیا، عسکری اور نجی املاک پر حملے کئے، توڑ پھوڑ اور جلاؤ گھیراؤ بھی کیا تھا۔ حکومت نے نقص امن کے خطرے کے پیش نظر پاکستان تحریک انصاف کی اعلیٰ قیادت کو حراست میں لے لیا تھا، جس میں شاہ محمود قریشی اور اسد عمر سمیت درجنوں افراد شامل تھے۔
پاکستان تحریک انصاف کے کئی رہنماؤں کو عدالتوں سے ضمانتوں پر رہائی کے بعد دوبارہ گرفتار کرلیا گیا جبکہ کئی رہنماؤں نے پارٹی چھوڑنے کا اعلان کردیا ہے۔
