اسلام آباد : سیشن عدالت نے پی ٹی آئی رہنما شہباز گل کی درخواست ضمانت پر پولیس کوکل تک ریکارڈ پیش کرنے کاحکم دے دیا۔
تفصیلات کے مطابق اسلام آباد ڈسٹرکٹ سیشن عدالت میں اداروں کے خلاف بغاوت پر اکسانے کے کیس میں ملزم شہباز گل کی بعد ازگرفتاری درخواست ضمانت پر سماعت ہوئی۔
سماعت ایڈیشنل سیشن طاہر عباس سپرا نے کی ، دوران سماعت ملزم شہباز گل کی جانب سے فیصل چوہدری اور سردارمصروف خان پیش ہوئے۔
جج نے استفسار کیا تفتیشی افسرکدھرہے، ریکارڈ کہاں ہے، کیا تفتیشی کونوٹس نہیں ملا، جس پر پولیس افسر نے بتایا کہ نوٹس شام کو ملا تھا اور تفتیشی صبح کے وقت کراچی نکل گیا تھا۔
پولیس کا کہنا تھا کہ تفتیشی افسر نے دوسرے ملزم کی گرفتاری کرنی ہے،ریکارڈ کراچی ساتھ لیکر گیا ہے، جس پر عدالت نے حکم دیا کہ
10بجےتک کا وقت دیتا ہو ں ریکارڈ یا تفتیشی پیش ہوں۔
پولیس آفیسر نے کہا وہ کراچی سے اتنی جلدی نہیں آسکتے تو جج کا کہنا تھا کہ میں نے تو نہیں کہا تھا تفتیشی کراچی جائے، فون کریں ان کو بلائیں نہیں آتے توایس ایچ او کو بلائیں۔
جج نے حکم دیا کہ اگر ریکارڈ نہیں آتا تو ایس ایس پی اور آئی جی اسلام آباد کو بلائیں گے۔
وقفے کے بعد دوران سماعت وکیل ملزم نے کہا کہ تفتیشی افسر اگر آج ریکارڈ نہیں لایاتو کل صبح تک رکھ لیں، جج نے پولیس آفیسر سے استفسار کیا کہ اگر آپ کی کوئی ریزرویشن ہے تو بتا دیں۔
پولیس افسر نے بتایا تفتیشی کل شام کو واپس پہنچے گا آپ پیر تک سماعت ملتوی کر دیں، جج نے ملزم کے وکلا سے مکالمے میں کہا کہ
آپ تفتیشی افسر کے لیے ٹکٹ کا ارینج کر دیں تو ملزم وکیل کا کہنا تھا کہ ہم تفتیشی افسر کو ایئر لائن کا ٹکٹ دینے کے لیے تیار ہیں۔
جج نے پولیس سے استفسار کیا آپ کو کتنے دن چاہئیں، جس پر پولیس افسر نے کہا کہ کل کا دن دےدیں پیر کو ریکارڈ پیش کر دیں گے۔
عدالت نے پولیس کو کل تک ریکارڈ پیش کرنے کاحکم دیتے ہوئے کہا کل ریکارڈ پیش نہ کیا تو آپ کے افسران کیلئےمسئلہ بن جائے گا۔