لاہور : صدر پی ٹی آئی چودھری پرویزالٰہی کی گرفتاری کیلئے پولیس ان کی رہائشگاہ پہنچ گئی۔ ترجمان پرویزالٰہی کا کہنا ہے کہ پولیس سرچ وارنٹ دکھائے گی تو گھر کی تلاشی لینے دیں گے۔
چودھری پرویزالٰہی کی گرفتاری کیلئے پولیس ان کی رہائشگاہ پہنچ گئی، پرویزالٰہی کے خلاف کارسرکار میں مداخلت پر غالب مارکیٹ میں مقدمہ درج ہے، پرویزالٰہی کے خلاف اختیارات کے ناجائز استعمال، اور ترقیاتی فنڈز میں خردبرد کا مقدمہ بھی درج ہے۔
اینٹی کرپشن عدالت کی جانب سے چودھری پرویزالٰہی کی ضمانت آج منسوخ کردی گئی ہے۔ چودھری پرویزالٰہی کے گھر پولیس پہنچنے پر ترجمان اقبال چودھری کا کہنا ہے کہ چودھری پرویز الٰہی گھر پر موجود نہیں ہیں۔
اس وقت گھر میں صرف پرویزالٰہی کی فیملی موجود ہے۔ پولیس سرچ وارنٹ دکھائے گی تو گھر کی تلاشی لینے دیں گے۔ یاد رہے آج اینٹی کرپشن عدالت میں سابق وزیراعلٰی پنجاب چوہدری پرویز الٰہی کی عبوری ضمانت کی درخواست پر سماعت ہوئی، سرکاری وکیل نے عدالت میں بتایا کہ پرویز الٰہی کی میڈیکل رپورٹ جعلی ہے،پرویز الٰہی نے او پی ڈی کی پرچیاں لگائیں جو جعلی ہیں۔
جو کچھ 9 مئی کو ہوا، وہ انتہائی افسوسناک اور قابلِ مذمت ہے
چوہدری پرویز الٰہی کے وکیل نے کہا کہ سابق وزیراعلٰی پنجاب کی میڈیکل رپورٹ درست ہے،اینٹی کرپشن والوں نے جواب موصول نہیں کیا۔ عدالت نے ریمارکس دئیے کہ پرویز الٰہی ٹی وی پر تو نظر آ رہے ہیں جس پر وکیل نے جواب دیا کہ وہ فوٹیج پرانی ہیں۔ اینٹی کرپشن عدالت نے سابق وزیراعلٰی پنجاب کی عبوری ضمانت عدم پیروی کی بنیاد پر خارج کرنے کا حکم دے دیا،عدالت نے حاضری معافی کی درخواست بھی خارج کر دی۔
واضح رہے کہ گزشتہ دنوں عدالت نے اینٹی کرپشن حکام کو چوہدری پرویز الٰہی کی گرفتاری سے روک دیا تھا،اینٹی کرپشن عدالت میں چوہدری پرویز الٰہی کی درخواست ضمانت پر سماعت ہوئی،عدالت نے سابق وزیراعلٰی پنجاب کی 11 مئی تک عبوری ضمانت منظور کی،عدالت نے اینٹی کرپشن حکام کو چوہدری پرویز الٰہی کی گرفتاری سے روک دیا تھا۔ اینٹی کرپشن نے پرویز الٰہی کیخلاف کرپشن کا مقدمہ درج کر رکھا ہے۔
قبل ازیں اینٹی کرپشن عدالت نے رشوت لینے کے الزام کے درج مقدمہ میں بھی چوہدری پرویز الٰہی کی عبوری ضمانت میں توسیع کی تھی۔ اینٹی کرپشن عدالت کے جج علی رضا نے چوہدری پرویز الٰہی کی درخواست ضمانت پر سماعت کی۔چوہدری پرویز الٰہی عبوری ضمانت کی معیاد ختم ہونے پر اپنے وکیل امجد پرویز کے ہمراہ عدالت میں پیش ہوئے تھے۔
