بھارت نے آئی سی سی چیئرمین کے عہدے پر نظریں جمالی ہیں جس کے لیے ان کے امیدواروں کی فہرست بھی طویل ہونے لگی ہے۔
انٹرنیشنل کرکٹ کونسل (آئی سی سی) کے بورڈ کی میٹنگ رواں ہفتے دبئی میں ہونے جارہی ہے جس میں دیگر اہم ایشوز سے قطع نظر بھارت نے اپنی تمام تر توجہ اس بات پر مرکوز کرلی ہے کہ موجود چیئرمین گریک برکلے اگلی مدت کے لیے بھی الیکشن میں حصہ لیتے ہیں یا نہیں۔
گریک برکلے کے عہدے کی مدت رواں سال نومبر میں ختم ہونے جارہی ہے جبکہ قانونی طور پر وہ مزید 2 مدتوں کے لیے الیکشن میں حصہ لینے کے اہل ہیں۔
میڈیا رپورٹس میں یہ بات سامنے آئی تھی کہ آئی سی سی کے موجودہ چیئرمین برکلے مزید اس عہدے پر کام جاری رکھنے میں دلچسپی نہیں رکھتے ہیں جس پر بھارتی کرکٹ بورڈ کے موجودہ صدرساروو گنگولی اور سیکرٹری جے شاہ میں سے کسی ایک کے الیکشن لڑنے کا امکان ظاہر کیا جارہا تھا۔
تاہم اب اس فہرست میں ایک اور بھارتی شخصیت انوراگ ٹھاکر کا بھی اضافہ ہوگیا ہے جو ماضی میں بھارتی کرکٹ بورڈ کے صدر اور آئی سی سی میں ڈائریکٹر کے طور پر اپنے فرائض انجام دے چکے ہیں۔
واضح رہےآئی سی سی کے چیئرمین کے الیکشن یا ری الیکشن کے عمل کا آغاز رواں ہفتے دبئی میں شیڈول میٹنگ میں کیا جائے گا۔
خیال رہے کہ 9 مئی تک یہ بھی واضح ہوجائے گا کہ گریک برکلے اگلی مدت کے لیے الیکشن میں حصہ لیں گے یا پھر اپنی مدت پوری کرکے سبگدوش ہوجائیں گے۔