راولپنڈی : آرمی چیف جنرل قمرجاویدباجوہ سوات پہنچ گئے، جہاں انھیں امدادی کارروائیوں پر بریفنگ دی گئی۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل بابر افتخار نے سماجی رابطے کی ویب سائٹ ٹوئٹر پر اپنے پیغام میں بتایا کہ آرمی چیف جنرل قمرجاویدباجوہ سوات پہنچ گئے۔
آرمی چیف کو امدادی کارروائیوں پر بریفنگ دی گئی جبکہ کمراٹ، کالام اور گردونواح سے متاثرین کی منتقلی سے بھی آگاہ کیا گیا۔
ڈی جی آئی ایس پی آر کا کہنا تھا کہ آرمی چیف متاثرہ افراد اورسیاحوں سےملاقات کریں گے ، سیاحوں اور مقامی افراد کو کمراٹ ،کالام سے ہیلی کاپٹر کے ذریعے ریسکیو کیا گیا تھا۔
ترجمان نے کہا کہ سیلاب میں پھنسے افراد کو ہیلی کاپٹر کے ذریعے کانجو کینٹ سوات منتقل کیا گیا تھا ، متاثرین میں خواتین، بچے، غیرملکی و دیگر افراد بھی شامل تھے۔
آئی ایس پی آر کے مطابق ضروری طبی امداد اور سہولیات کے بعد یہ افراد اپنے آبائی علاقوں کو روانہ ہوجائیں گے۔
خیال رہے پاک فوج کا سیلاب میں پھنسے لوگوں کوریسکیوکرنےکیلئےآپریشن جاری ہے، کلام سے بڑی تعداد میں لوگوں کو ریسکیو کیا گیا۔
متاثرین کا کہنا ہے کہ پاک فوج نے جو احسان کیا ہے وہ کبھی نہیں بھولیں گے، کالام میں پھنسے سیاح نے کہا پاک فوج نے ہماری جان بچائی۔