لاہور: آسٹریلین کرکٹ ٹیم کے کپتان پیٹ کمنز کا کہنا ہے کہ کراچی ٹیسٹ میچ نہ جیتنے پر دکھ ہے لیکن ہم نے بہت اچھی کرکٹ کھیلی۔
آسٹریلوی کرکٹ ٹیم کے کپتان پیٹ کمنز کا میڈٰیا سے گفتگو کرتے ہوئے کہنا تھا کہ بہترین سیکورٹی اور دیگر انتظامات کرنے پر شکر گزار ہوں۔
انہوں نے کہا کہ تیسرے ٹیسٹ میچ کا منتظر ہوں جبکہ دوسرے ٹیسٹ میچ کی جیت کے قریب تھے۔ کراچی ٹیسٹ میچ نہ جیتنے پر دکھ ہے لیکن ہم نے بہت اچھی کرکٹ کھیلی۔
ان کا کہنا تھا کہ آج لاہور میں گالف کھیل کر بہت اچھا لگا، گالف کے لیے صبح جلدی اٹھے اور پہلی بار ہوٹل سے باہر نکل کر اچھا لگا ہے۔
پیٹ کمنز کا کہنا تھا کہ میرے دوسرے ساتھیوں نے بھی گالف کھیلی ، جوش ہیزل ووڈ اچھی گالف کھیلتے ہیں۔
اس سے قبل آسٹریلین کرکٹ ٹیم کے کپتان نے سماجی رابطے کی مائیکرو بلاگنگ ویب سائٹ ٹوئٹر پر صبح سویرے گالف کھیلنے کی تصویر شیئر کی تھی۔
تصویر کو شیئر کرتے ہوئے انہوں نے لکھا تھا کہ لاہور میں ڈے آف گزارنے کا اچھا موقع ملا ، گالف کورس پر صبح بہت اچھی گزری۔
واضح رہے کہ پاکستان اور آسٹریلیا کے درمیان 3 ٹیسٹ میچز پر مشتمل سیریز جاری ہے جس کے دو میچز ڈرا ہوگئے ہیں جبکہ تیسرا اورآخری میچ 21 سے 25 مارچ کے دوران لاہورکے قذافی اسٹیڈیم میں کھیلا جائے گا۔