کراچی : کمشنر کراچی اقبال میمن نے دودھ کی قیمتوں سے متعلق آج اہم اجلاس طلب کرلیا اور کہا معاملے کا حل چاہتے ہیں۔
تفصیلات کے مطابق دودھ کی قیمتوں میں اضافے سے متعلق کمشنر کراچی اقبال میمن نے گفتگو کرتے ہوئے کہا کہ دودھ کی قیمتوں کےمتعلق آج اہم اجلاس طلب کرلیا ہے۔
کمشنرکراچی کا کہنا تھا کہ ابھی تک دودھ کی قیمت 120 روپے فی لیٹر ہے، اضافی قیمت وصول کرنےوالوں کے خلاف کارروائیاں جاری ہیں۔
اقبال میمن نے کہا کہ 20سے زائد دودھ فروشوں کو گرفتار کیا ہے،جرمانے بھی کیے گئے ہیں، معاملے کا حل چاہتے ہیں، کسی کوتکلیف نہیں دیناچاہتے۔
خیال رہے کراچی میں دودھ 200 روپے سے زائد قیمت پرفروخت کیا جا رہا ہے جبکہ ڈیری فارمز نے دودھ کی قیمت میں مزید اضافے کی دھمکی دے رکھی ہے۔
ڈیری فارمرز ایسوسی ایشن نے دودھ کی قیمت بڑھانے کی وجہ پیداواری لاگت کو قرار دیتے ہوئے کہا تھا کہ اجناس اور مال بردار گاڑیوں کے کرایوں میں اضافے کی وجہ سے دودھ کے نرخ بڑھائے گی۔