پشاور : محکمہ موسمیات نے خیبر پختونخوا میں بارشوں کا نیا سلسلہ کل سے شروع ہونے کی پیش گوئی کردی ہے۔
تفصیلات کے مطابق محکمہ موسمیات کی جانب سے بیان میں کہا گیا ہے کہ خیبر پختونخوا میں بارشوں کانیا سلسلہ کل سےشروع ہونےکا امکان ہے، بارشوں کا سلسلہ بدھ کے روز تک وقفے وقفے سے جاری رہے گا۔
پی ڈی ایم اے نے ضلعی انتظامیہ کو مراسلہ جاری کر دیا ہے ، جس میں گرج چمک کے ساتھ تیز بارشوں کے پیش نظر متعلقہ اداروں کو پیشگی اقدامات کی ہدایات کی گئی ہے۔
پی ڈی ایم اے کا کہنا ہے کہ بالائی علاقوں میں لینڈسلائیڈنگ کا خدشہ ہے، جہاں لینڈسلائیڈنگ کا خطرہ ہو وہاں مشینری کی دستیابی یقینی بنا ئی جائے۔
ڈی جی پی ڈی ایم اے نے بتایا کہ شہری علاقوں اربن فلڈنگ اوربرساتی نالوں میں پانی کے بہاؤ میں اضافےکا امکان ہے ، اس لیے سیاح دوران سفر احتیاطی تدابیر اختیار کریں۔
ڈی جی پی ڈی ایم کا کہنا تھا کہ پی ڈی ایم اے کا ایمر جنسی آپریشن سینٹر مکمل فعال ہے۔