لاہور : پنجاب پولیس نے ضمنی انتخابات کی مانیٹرنگ کے لیے کنٹرول روم قائم کردیا ، 3100 سے زائد پولنگ اسٹیشنز پر 52 ہزار سے اہلکار و افسران تعینات ہوں گے۔
تفصیلات کے مطابق پنجاب پولیس نے ضمنی انتخابات کے پرامن انعقاد کے لیےتیاریاں مکمل کرلیں اور کنٹرول روم قائم کردیا۔
آئی جی پنجاب نے کہا کہ 20 حلقوں میں سیکیورٹی انتظامات یقینی بنائے جائیں گے، 3100 سے زائد پولنگ اسٹیشنز پر 52 ہزار سے اہلکار و افسران تعینات ہوں گے۔
آئی جی پنجاب کا کہنا تھا کہ خواتین پولنگ اسٹیشنز پر خواتین اہلکار فرائض سر انجام دیں گی ، لاہور کے 4 حلقوں میں 9 ہزار سے زائد اہلکارتعینات ہوں گے۔
آئی جی پنجاب نے مزید کہا کہ سیف سٹی کیمرے مانیٹرنگ میں مدد دیں گے، تعینات افسران و اہلکار آج سے ہی فرائض کی ادائیگی یقینی بنائیں گے۔
دوسری جانب الیکشن کی مانیٹرنگ کے لیے سنٹرل پولیس آفس اور ضلعی سطح پر کنٹرول روم قائم کردیا گیا ہے۔
آئی جی پنجاب نے بتایا کہ انتخابی سامان اوربیلٹ پیپرز کی بحفاظت ترسیل کو ہر صورت یقینی بنایا جائے گا اور نقص امن کا باعث بننے والے عناصر قانون کی گرفت میں ہوں گے۔
ان کا کہنا تھا کہ الیکشن کمیشن کو پوری معاونت فراہم کی جائے گی، ہر حلقے میں اینٹی رائٹ اور ایلیٹ فورس کے جوان الرٹ رہیں گے۔
آئی جی پنجاب نے مزید کہا کہ تمام جماعتوں کے امیدواروں سے بلاامتیاز شیورٹی بانڈز لے لیے گئے ہیں، نتائج کے اعلان کے بعد لڑائی جھگڑے، ہوائی فائرنگ نہیں کرنے دی جائے گی۔
ضمنی انتخابات کےحلقوں میں پولیس کے فلیگ مارچ لاہور اور ملتان میں خصوصی اقدامات کئے گئے ہیں۔
خیال رہے پنجاب کے 20 حلقوں میں ضمنی انتخاب کا معرکہ کل ہوگا ، چودہ اضلاع کے تقریبا پینتالیس لاکھ اسی ہزار ووٹر ووٹ کاسٹ کریں گے۔
ووٹنگ کےلیےتین ہزار سے زائد پولنگ اسٹیشن قائم کیے گئے ہیں ، جس میں سے انیس سو انتخابی مراکز حساس قرار دیئے جبکہ لاہور اور ملتان کےحلقے انتہائی حساس قرار دیے گئے ہیں۔
واضح رہے ضمنی انتخابات کی بیس نشستیں پی ٹی آئی ارکان کے منحرف ہونے پر خالی ہوئی تھیں۔