کراچی : محکمہ موسمیات نے آئندہ 48 گھنٹے میں سردی کی شدت میں اضافے کا امکان ظاہر کرتے ہوئے کہا کہ ہواؤں کے باعث سردی کی شدت زیادہ محسوس ہوگی۔
تفصیلات کے مطابق کراچی میں سائبیریا کی ہواؤں کے اثرات کے باعث سردی کی شدت بڑھ گئی ، رات بھرخنکی چھائی رہی اور صبح کے اوقات میں درجہ حرارت 9 ڈگری ریکارڈ کیا گیا۔
محکمہ موسمیات کا کہنا ہے کہ آج مطلع جزوی ابرآلود جبکہ موسم سرد اور خشک رہے گا، آج زیادہ سے زیادہ درجہ حرارت 24 ڈگری تک جانے کا امکان ہے۔
محکمہ موسمیات نے آئندہ 48 گھنٹے میں سردی کی شدت میں اضافے کا امکان ظاہر کرتے ہوئے کہا کہ صبح و شام ہواؤں کے باعث سردی کی شدت زیادہ محسوس ہوگی۔
دوسری جانب پنجاب میں دھند کا راج برقرار ہے ، شدید دھند کے باعث موٹر ویز کو مختلف مقامات پر بند کردیا گیا ہے، ترجمان کا کہنا ہے کہ موٹر وے ایم2ٹھوکرنیازبیگ سے شیخوپورہ تک ، موٹر وے ایم 3 فیض پور سے سمندری تک بند ہے۔
ترجمان کے مطابق موٹروے ایم 4 شیرشاہ سے شام کوٹ ، موٹر وے ایم 5 جلالپور سے شیرشاہ اورموٹر وے ایم11محمود بوٹی میاں ٹول پلازہ سے سمبڑیال تک بند ہے۔