کابل : افغانستان کی نئی طالبان حکومت نے ملک کی پیشہ ور فوج بنانے کا باقاعدہ اعلان کردیا، افغان آرمی چیف قاری فصیح الدین کا کہنا ہے کہ فوج ملک کی سرحدوں کی حفاظت کرے گی۔
قاری فصیح الدین کے بیان کے مطابق افغانستان کے آرمی چیف نے مزید کہا کہ نئی فوج اہل افسران پر مشتمل ہوگی جن میں گذشتہ حکومت کے فوجی بھی شامل کیے جائیں گے، طالبان کے خلاف لڑنے والوں کے ساتھ سختی سے نمٹا جائے گا۔
ان کا کہنا تھا کہ ایسے لوگ جنھوں نے تربیت حاصل کی ہے اور پیشہ ور ہیں وہ ہماری نئی فوج میں استعمال ہوسکیں گے، ہمیں امید ہے یہ فوج مستقبل قریب میں تشکیل دی جائے گی۔
افغانستان کے ایک مقامی اخبار کے مطابق کابل میں گزشتہ روز ایک اجلاس منعقد ہوا جس میں قاری فصیح الدین نے پنجشیر میں طالبان مخالف اتحاد کا ذکر نہیں کیا۔
مگر ان کا کہنا تھا کہ نسل، مزاحمت اور جمہوریت کے دفاع کے نام پر طالبان کے خلاف لڑنے والوں کے خلاف کارروائی کی جائے گی۔
واضح رہے کہ طالبان نے گزشتہ ہفتے پنجشیر میں مکمل کنٹرول حاصل کرنے کا دعویٰ کیا تھا جبکہ اس اس لڑائی میں شہری ہلاکتوں کی تردید کی تھی۔