اسلام آباد : الیکشن کمیشن کی جانب سے کراچی کے بلدیاتی انتخاب سے متعلق آج فیصلے کا امکان ہے۔
تفصیلات کے مطابق الیکشن کمیشن نے کراچی کے بلدیاتی انتخاب کے معاملے پر اہم اجلاس آج طلب کر لیا ہے۔
ذرائع نے بتایا کہ الیکشن کمیشن کا اہم اجلاس چیف الیکشن کمشنرکی سربراہی میں ہوگا ، جس میں سندھ حکومت حکام اور وزارت داخلہ حکام بھی شریک ہوں گے۔
ذرائع الیکشن کمیشن کا کہنا ہے کہ اجلاس میں سندھ حکومت کے نمائندے بریفنگ دیں گے۔
گذشتہ روز سندھ حکومت نے الیکشن کمیشن کو بلدیاتی انعقاد کے لیے لکھے گئے خط کا جواب دیتے ہوئے بتایا تھا کہ کم از کم 3 ماہ تک الیکشن نہیں کروا سکتے۔
سندھ حکومت نے الیکشن کمیشن کے خط کے جواب میں مؤقف اختیار کیا تھا کہ سندھ میں پولیس فورس موجود نہیں ہے، کراچی پولیس کا کہنا ہے کہ بلدیاتی الیکشن کے لیے 37 ہزار پولیس اہلکار درکار ہیں۔
جواب میں کہا گیا تھا کہ سیلاب کے باعث 17 ہزار اہلکار دیگر اضلاع سے نہیں آ سکتے، لانگ مارچ کے لیے 5 ہزار اہلکار سندھ سے اسلام آباد گئے ہیں۔
صوبائی حکومت کا کہنا تھا کہ وزارت داخلہ کی درخواست پر اہلکار سندھ سے اسلام آباد بھیجے گئے، کم از کم 3 ماہ بلدیاتی الیکشن نہیں کروا سکتے۔