کراچی: گزشتہ روز شہر قائد کے علاقے صدر میں ہونے والے موٹر سائیکل بم دھماکے میں جاں بحق نوجوان کی شناخت عمر صدیق کے نام سے ہوئی ہے۔
تفصیلات کے مطابق کراچی بم دھماکے میں جاں بحق ہونے والے بد قسمت نوجوان سے متعلق معلوم ہوا ہے کہ ان کا تعلق پنجاب کے شہر رحیم یار خان سے تھا۔
ڈائریکٹر جناح اسپتال شاہد رسول نے بتایا کہ عمر صدیق جناح اسپتال کا ٹیکنیشن تھا، ان کا تعلق رحیم یار خان سے ہے، شاہد رسول نے یہ بھی بتایا کہ دھماکے کے 5 دیگر زخمی ایمرجنسی وارڈ میں ہیں، جب کہ ایک زخمی کو آپریشن تھیٹر منتقل کیا گیا ہے۔
دوسری طرف عمر صدیق کی لاش رحیم یار خان منتقل کر دی گئی ہے،جاں بحق نوجوان کی تدفین آبائی علاقے میں کی جائے گی، اہل خانہ کا کہنا ہے کہ عمر صدیق کراچی میں بزرٹا لائن میں رہائش پذیر تھا۔
اہل خانہ کے مطابق:جاں بحق نوجوان جناح اسپتال میں ایکسرے کا کورس کر رہا تھا، وہ دھماکے کے وقت جائے وقوعہ سے گزر رہا تھا کہ زد میں آ گیا۔
خیال رہے کہ صدر کے علاقے داؤ پوتہ روڈ پر ہونے والے دھماکے میں ایک شخص جاں بحق جب کہ 13 شدید زخمی ہو گئے تھے، اس دھماکے کی ذمے داری کالعدم سندھو دیش لبریشن آرمی نے قبول کر لی ہے۔