سابق صدر آصف علی زرداری نے کہا ہے کہ ملک میں آئین اور جمہوریت کی بحالی کیلئے نوجوانوں کا بے مثال کردار ہے اور یہ نوجوان ہی پاکستان کا مستقبل ہیں۔
سابق صدر آصف علی زرداری نے نوجوان کے عالمی دن پر پیغام جاری کرتے ہوئے کہا ہے کہ بیروزگاری کی وجہ سے نوجوان احساس محرومی کے شکار ہوتے ہیں لیکن پاکستان پیپلزپارٹی جب بھی اقتدار میں آئی ہے نوجوانوں کیلئے روزگار کے مواقع فراہم کئے ہیں۔
انہوں نے کہا کہ پاکستان سیاستدانوں نے بنایا تھا اور سیاستدان ہی اس کی تعمیر کرتے رہے ہیں اور سیاستدانوں کی کردار کشی کا سلسلہ بہت پرانا ہے لیکن آنے والے نسلوں کو باوقار اور مہذب معاشرہ دینے کیلئے نوجوانوں کو آگے آنا ہوگا۔
انہوں نے مزید کہا کہ پیپلزپارٹی قائد عوام ذوالفقار علی بھٹو شہید اور محترمہ بینظیر بھٹو شہید کے فلسفے کے مطابق نوجوانوں کو بہتر مستقبل دے گی۔
دوسری جانب چیئرمین پی پی و وزیرِ خارجہ بلاول بھٹو زرداری نے بھی نوجوانوں کے عالمی دن پر پیغام جاری کیا ہے۔
انہوں نے کہا ہے کہ ملک کا سب سے قیمتی خزانہ ہماری نوجوان نسل ہے، اکثر ترقی یافتہ ممالک کی آبادی بڑی عمر کے افراد پر مشتمل ہے، جبکہ پاکستان کی 64 فیصد آبادی نوجوان ہے۔
انہوں نے مزید کہا کہ ملک کو ترقی کی راہ پر گامزن کرنے کے لئے نوجوان نسل کے خوابوں اور امنگوں کو حقیقت بنانے کے آگے حائل تمام رکاوٹوں کو دور کرنا ہوگا اور نوجوان نسل کی ترقی پاکستان پیپلز پارٹی کی اولین ترجیحات میں شامل ہے۔
بلاول بھٹو نے کہا کہ مفت تعلیم اور سب کے لیے روزگار پاکستان پیپلز پارٹی کے منشور کا حصہ ہے اور وقت آگیا، پالیسی سازی و فیصلہ سازی میں نوجوانوں کو شراکتدار بنایا جائے۔