قومی ٹیم کے کپتان بابر اعظم کا کہنا ہے کہ ایسی جیت سے اعتماد میں اضافہ اور فائدہ ہوتا ہے۔
آسٹریلیا کے خلاف دوسرا ون ڈے میچ جیتنے کے بعد پریس کانفرنس کرتے ہوئے بابر اعظم کا کہنا تھا کہ جیت کا کریڈٹ پوری ٹیم کو جاتا ہے۔
انہوں نے کہا کہ دوسرے ون ڈے میں پلان کے مطابق کھیلا اور ریکارڈ ساز ہدف کے تعاقب سے جو مومنٹم ملا اسے برقرار رکھیں گے۔
ان کا کہنا تھا کہ اب کاکرکردگی کا تسلسل برقرار رکھنا ہے، بولنگ میں رنز دیے لیکن بولرز اچھا کرنے کی کوشش کررہے ہیں۔
بابر اعظم کا کہنا تھا کہ وکٹیں موجود ہوں تو اعتماد ملتا ہے جبکہ ہمیں اس میچ میں پارٹنر شپ کا فائدہ ہوا، امام الحق سے میچ کے دوران یہی بات ہوتی رہی کہ دیر تک کھیلنا ہے۔
انہوں نے مزید کہا کہ اس جیت سے اب ٹیم میں یقین بڑھے گا اور ہم کسی بھی صورتحال میں ہدف حاصل کرسکتے ہیں۔
واضح رہے کہ گذشتہ روز پاکستان اور آسٹریلیا کے درمیان ون ڈے سیریز کا دوسرا میچ لاہور کے قذافی اسٹیڈیم میں کھیلا گیا جس میں پہلے بیٹنگ کرتے ہوئے آسٹریلیا کے مقررہ 50 اوورز میں 348 رنز کا ہدف دیا تھا۔
اس میچ میں پاکستان نے بابراعظم اور امام الحق کی سنچری کی بدولت مطلوبہ ہدف ایک اوور پہلے ہی 4 وکٹوں کے نقصان پر پورا کرلیا تھا جس کے بعد سیریز 1-1 سے برابر ہوگئی ہے۔