قطر میں جاری فیفا ورلڈ کپ میں بیلجیئم کے خلاف مراکش کی دو صفر سے جیت کے بعد برسلز میں شائقین نے ہنگامہ برپا کردیا۔
غیر ملکی میڈیا رپورٹ کے مطابق بیلجیئم کے خلاف مراکش کی دو صفر سے فتح کے بعد برسلز میں درجنوں شائقین نے اتوار کو دکانوں کی کھڑکیاں توڑ دیں، آتش بازی کی اور گاڑیوں کو نذر آتش کیا۔
برسلز کی پولیس نے بتایا کہ میچ ختم ہونے سے قبل درجنوں افراد نے پولیس کے ساتھ تصادم کی کوشش کی، جس سے عمومی سکیورٹی متاثر ہوئی، جس کے بعد 11 افراد کو گرفتار کیا گیا ہے۔
ترجمان کے مطابق کچھ شائقین کے لاٹھیوں سے لیس تھے، اور آتش بازی سے صحافی کو بھی نقصان پہنچا، تشدد کے پھیلاؤ کو روکنے کے لیے میٹرو اسٹیشنوں کو بند اور گلیوں کو سیل کردیا گیا تھا۔
برسلز کے میئر فلپ کلوز نے ٹویٹ میں کہا کہ میں آج دوپہر کو ہونے والے واقعات کی سخت الفاظ میں مذمت کرتا ہوں، پولیس پہلے ہی اس معاملے میں مداخلت کر چکی ہے لہذا میں شائقین کو شہر کے مرکز میں نہ آنے کا مشورہ دیتا ہوں۔
یہ بھی پڑھیں : سعودی فٹبال ٹیم کو رولز رائس فینٹم بطور تحفہ ملنے کی حقیقت سامنے آگئی
میئر فلپ کلوز کا مزید کہنا تھا کہ پولیس امن عامہ کو برقرار رکھنے کے لیے ہر ممکن کوشش کر رہی ہے۔ میں نے پولیس کو حکم دیا ہے کہ وہ فسادیوں کو گرفتار کرے۔
واضح رہے کہ بیلجیئم میں مراکش نسل کے تقریباً پانچ لاکھ افراد رہتے ہیں۔
یاد رہے کہ فیفا کی عالمی رینکنگ میں 22 ویں نمبر پر موجود مراکش نے عالمی نمبر 2 بیلجیئم کو ورلڈکپ میں 2 صفر سے شکست دی۔