ویرات کوہلی کی خراب پرفارمنس پر انہیں بریک دیے جانے کا مطالبہ زور پکڑنے لگا ہے جس پر سابق بھارتی کپتان سنیل گواسکر کا کہنا ہے کہ ڈریسنگ روم میں بیٹھ کر کوئی فارم حاصل نہیں ہوتی۔
بھارتی کرکٹ ٹیم کے سابق کپتان ویرات کوہلی کا آئی پی ایل 2022 میں بھی بلا خاموش ہے جبکہ وہ رنز بنانے کے لیے جدوجہد بھی کرتے دکھائی دے رہے ہیں لیکن انہیں کوئی کامیابی نہیں مل پارہی۔
ایک دن قبل بھی سن رائزز حیدر آباد کے خلاف میچ میں ویرات کوہلی ایک مرتبہ پھر صفرپر آؤٹ ہوگئے جبکہ اس سیزن میں یہ تیسرا موقع تھا جب ویرات کوہلی صفر پر آؤٹ ہوئے۔
ویرات کوہلی کے بغیر کھاتہ کھولے پویلین لوٹ جانے کے بعد انہیں ایک مرتبہ پھر آرام دیے جانے کا مشورہ زور پکڑنے لگا ہے۔
حال ہی میں سابق بھارتی چیف کوچ روی شاستری نے بھی انہیں آرام دینے کا مشورہ دیا تھا جس کی تائید کئی بھارتی عظٰیم کرکٹرز نے بھی کی تھی تاہم سابق بھارتی کپتان سنیل گواسکر اس کے خلاف ہیں۔
سنیل گواسکر کا کہنا ہے کہ آرام کا مطلب یہ نہیں کہ وہ بیٹھ کر بھارت کے میچز کو یاد کریں، بھارت کے لیے کھیلنا ان کی پہلی اور اولین ترجیح ہونی چاہیے۔
انہوں نے کہا کہ ’میرا یہ ماننا ہے کہ اگر وہ کھیلیں گے ہی تو کیسے اپنی کھوئی ہوئی فارم واپس حاصل کریں گے؟ چینجنج روم میں بیٹھے رہنے سے تو آپ کا فارم واپس نہیں آئے گا۔
ان کا کہنا تھا کہ آپ جتنا زیادہ کھیلیں گے اتنا ہی زیادہ اس بات کا بھی امکان ہوگا کہ آپ اپنی فارم میں واپس لوٹ آئیں۔ بھارت میں جو بھی کرکٹ کو جانتا اوراس کو فولو کرتا ہے، ان سب کو ہی بھارت کے لیے ویرات کا فارم واپس چاہیے۔
انہوں نے مزید کہا کہ آپ بھارت کے لیے کھیلنے سے تو بریک نہیں لے سکتے کیونکہ ہم سب چاہتے ہیں کہ ویرات کوہلی بھارت کے لیے دوبارہ رنز بنانا شروع کریں۔
واضح رہے کہ بھارت کے سابق کپتان ویرات کوہلی نے آئی پی ایل کے رواں سیزن میں 12 میچز کھیل کر 111 کے اسٹرائیک ریٹ سے صرف 216 رنز ہی بنائے ہیں۔
انہوں نے اس سیزن میں صرف ایک نصف سنچری اسکور کی ہے جبکہ یہ کسی بھی آئی پی ایل میں ان کی سب سے خراب پرفارمنس رہی ہے۔