بھارتی کرکٹ ٹیم کے سابق کپتان ویرات کوہلی نے ون ڈے انٹرنیشنل کرکٹ میں تیز ترین 13 ہزار رنز مکمل کر لیے۔
بھارت کے تجربہ کار بیٹر ویرات کوہلی اپنے آئیڈیل سچن ٹنڈولکر کو پیچھے چھوڑتے ہوئے تیز ترین 13,000 ون ڈے رنز بنانے والے کھلاڑی بن گئے ہیں۔
34 سالہ کھلاڑی نے پیر کو آر پریماداسا اسٹیڈیم کولمبو میں پاکستان کے خلاف ایشیا کپ میں سپر 4 مرحلے کے اہم میچ کے دوران اپنی 267 ویں اننگ میں یہ تاریخی کارنامہ سرانجام دیا۔
کوہلی نے سپر فور مرحلے کے اہم میچ میں پاکستان کے خلاف 94 گیندوں پر 122 رنز کی شاندار اننگ کھیلی اور ٹیم کے بڑے ہدف میں اہم کردار ادا کیا۔
خیال رہے کہ بھارت کے لیجنڈ کرکٹر سچن ٹنڈولکر نے 321 ون ڈے اننگز میں اس سنگ میل کو عبور کیا تھا۔
سابق آسٹریلوی کپتان رکی پونٹنگ نے 341 ، سری لنکا کے سابق پلیئرز کمار سنگاکارا اور ستنھ جے سوریا نے باالترتیب 363 اور 416 اننگز میں یہ کارنامہ سرانجام دیا تھا۔
یاد رہے کہ مجموعی طور پر کوہلی ون ڈے میں سب سے زیادہ رنز بنانے والے کھلاڑیوں کی فہرست میں پانچویں نمبر پر ہیں۔