لاہور:پنجاب اسمبلی کے نومنتخب اراکین اسمبلی نے حلف اٹھا لیا،
اسپیکر پنجاب اسمبلی سبطین خان نے اراکین اسمبلی سے حلف لیا ،حلف اٹھانے کے بعد سپیکر پنجاب اسمبلی نے تمام نومنتخب اراکین اسمبلی کو مبارکباد پیش کی۔انہوں نے تمام نومنتخب اراکین اسمبلی سے کہا کہ امید کرتا ہوں کہ آپ تمام لوگ عوام کی امیدوں پر پورا اتریں گے۔
اسپیکر اور ڈپٹی اسپیکر کا انتخاب کل ہوگا جو خفیہ رائے شماری سے کیا جائیگا۔اسپیکر اور ڈپٹی اسپیکر پنجاب اسمبلی کے انتخاب کا شیڈول بھی جاری کر دیاگیا ہے ۔
سیکرٹری پنجاب اسمبلی کا اس حوالے سے کہنا ہے کہ اسپیکر اور ڈپٹی اسپیکر پنجاب اسمبلی کیلئے کاغذات نامزدگی آج جمع کروائے جا سکیں گے جبکہ کاغذات کی جانچ پڑتال بھی آج ہی ہو گی۔
پی ٹی آئی کے وزیراعلیٰ کے عہدے کیلئے نامزد امیدوار اسلم اقبال اسمبلی نہ پہنچ سکے۔
ن لیگ اور اتحادی جماعتوں کی طرف سے ملک احمد خان کو سپیکر اور نذیر احمد چنہڑ کو ڈپٹی سپیکر کی جانب سے نامزد کیا گیا ۔
اس سے قبل آج صبح سپیکر سبطین خان کی زیر صدارت نو منتخب ارکان اسمبلی کی حلف برداری کیلئے پنجاب اسمبلی کا اجلاس شروع ہوتے ساتھ ہی 45 منٹ کیلئے ملتوی کر دیا گیاجونماز جمعہ کے بعد دوبارہ شروع ہوا،سپیکرپنجاب اسمبلی سبطین خان نے نومنتخب اراکین پنجاب اسمبلی سے حلف لیا۔
آئی پی پی اور ن لیگ کا سیاسی تعاون کو مضبوط بنانے پر اتفاق
پنجاب اسمبلی کااجلاس اپنے مقررہ وقت سے 2گھنٹے لیٹ شروع ہوا تھا ۔ اسمبلی کا اجلاس آج صبح 10 بجے طلب کیا گیا تھا جو تاخیر کا شکار رہا۔اجلاس کے آغاز پر ن لیگی ارکان نے اسپیکر سے حلف لینے کی استدعا کی تاہم اسپیکرنے بغیرحلف لئے اجلاس میں وقفہ کردیا۔
اسپیکر پنجاب اسمبلی کا کہنا ہے کہ پی ٹی آئی کے نامزد وزیراعلیٰ اسلم اقبال کے پروڈکشن آرڈر جاری کررہا ہوں۔
سنی اتحاد کونسل کے اراکین نے ایوان میں نعرے بازی کی اورن لیگ کے خلاف نعرے بازی کی جب کہ لیگی ارکان نے بھی ان کے نعروں کا جواب دیا، اجلاس میں سنی اتحاد کونسل اور (ن) لیگ کے ارکان میں تلخ کلامی بھی ہوئی۔
ایوان میں آمد پر میڈیا نمائندگان کے سوالوں کے جواب میں مریم نواز نے کہاکہ اللہ کرے پنجاب میں خدمت کا ایک نیا دور شروع ہو۔مسلم لیگ (ن) کی نامزد وزیراعلیٰ مریم نواز بھی حلف اٹھانے کیلئے اسمبلی میں موجود تھیں،
مریم نواز کے اسمبلی آنے پر اراکین نے شیر شیر کے نعرے لگائے جب کہ لیگی ارکان نواز شریف کی تصاویر لے کر ایوان پہنچے جبکہ سنی اتحاد کونسل کے ارکان بھی اسمبلی میں موجود ہیں جنہوں نے (ن) لیگ کے خلاف نعرے بازی کی جب کہ لیگی ارکان نے بھی ان کے نعروں کا جواب دیا۔