روسی فوج کے یوکرین میں داخلے کے بعد عالمی برادری کو جہاں معاشی سطح پر شدید نقصان پہنچا ہے وہیں ایک دن میں کرپٹو کرنسی کی قدر میں بھی خاطر خواہ کمی ہوئی ہے۔
کرپٹو کرنسی کے ماہرین عام طور اسے خاص طور پر بٹ کوائن کو جغرافیائی سیاسی کشیدگی کے اثرات سے محفوظ سمجھتے ہیں لیکن روس یوکرین تصادم نے اسے بھی جھنجھوڑ کر رکھ دیا ہے۔
صرف ایک دن میں بٹ کوائن کی قدر میں 7.9 فیصد کمی ہوئی ہے۔ جس کے بعد اب ایک بٹ کوائن 34 ہزار 324 ڈالر کی سطح پر آگیا ہے۔
گزشتہ سال نومبر سے بٹ کوائن کی قدر میں مسلسل کمی دیکھی جارہی ہے۔
نومبر 2021 میں ایک بٹ کوائن کی قدر 69 ہزار امریکی ڈالر کے مساوی تھی تاہم تب سے اب تک اس کی قدر میں 50 فیصد کمی آئی ہے۔
دوسری جانب بٹ کوائن کے علاوہ دیگر کرپٹو کرنسیوں کی قدر میں بھی 10 فیصد تک کمی دیکھی گئی ہے۔
یہ بھی پڑھیں : روس یوکرین تنازع کے بعد امریکا اور روس کی کرنسی دباؤ کا شکار
واضح رہے کہ گزشتہ 2 روز کے دوران عالمی اسٹاک مارکیٹوں اور یو ایس بانڈز کی قدر میں کمی آئی ہے جبکہ سونے اور تیل کی قیمتیں بلند ہوئیں ہیں۔
فروری 2021 میں بٹ کوئن کی قدر میں اس وقت بہت زیادہ اضافہ ہوا تھا جب ایلون مسک نے بٹ کوائن کے ذریعے اپنی موٹر کمپنی ٹیسلا کی تیار کردہ الیکٹرک گاڑیوں کی قیمت وصول کرنے کا اعلان کیا تھا۔
ایک وقت میں ایک بٹ کوئن 69 ہزار امریکی ڈالر کے مساوی ہوگیا تھا۔
اس کے کچھ وقت بعد ایلون مسک نے یہ فیصلہ واپس لینے کا اعلان کردیا تھا، جس نے بٹ کوئن کی قدر میں پھر کمی کی ۔