اسلام آباد : اینکرپرسن ارشد شریف کی نمازجنازہ جمعرات کو اسلام آباد میں اداکی جائے گی۔
تفصیلات کے مطابق صحافی ارشد شریف اہلِ خانہ کی جانب سے بیان میں کہا گیا ہے کہ ارشد شریف کی نماز جنازہ اور تدفین جمعرات کو اسلام آباد میں ہوگی، وقت اور تدفین کی جگہ کے بارے میں بعد میں آگاہ کیا جائے گا۔
یاد رہےارشد شریف کا جسد خاکی نیروبی ائیرپورٹ سے پاکستان روانہ کردیا گیا ہے، جسد خاکی غیرملکی پرواز کےذریعہ دوحہ کے راستے آج رات ایک بج کر پانچ منٹ پراسلام آبادپہنچے گا۔
وفاقی وزیر اطلاعات مریم اورنگزیب نے بتایا تھا کہ نیروبی میں پوسٹ مارٹم کے بعدجسد خاکی کی وطن روانگی کی کارروائی پاکستان کی سفیر سیدہ ثقلین کی موجودگی میں انجام پائی۔
ان کا کہنا تھا کہ ارشدشریف کاجسد خاکی لانے والی پرواز نے نیروبی سے پاکستانی وقت کے مطابق رات تین بج کر پچیس منٹ پر اڑان بھری۔
خیال رہےارشد شریف تحقیقاتی صحافت میں جاندارتجزیوں اور بےلاگ تبصروں کے باعث جانے جاتے تھے، انھوں نے ہمیشہ نڈر اور بے باک صحافی ہونے کا ثبوت دیا۔