عالمی مالیاتی فنڈ (آئی ایم ایف) مشن آج پاکستان پہنچے گا۔
ذرائع کے مطابق آئی ایم ایف مشن کی فلائٹ رات 1 بج کر 40 منٹ پر لینڈ کرے گی۔
ذرائع کے مطابق آئی ایم ایف مشن میں 8 افراد شامل ہیں جو اقتصادی جائزہ کیلئے پہنچ رہے ہیں، مذاکرات میں وزارت خزانہ میں قائم آئی ایم ایف آفس کے 2 لوگ شریک ہوں گے، مجموعی طور پر 10 افراد 15 تاریخ تک معاشی ٹیم سے مذاکرات کریں گے۔
ذرائع کا کہنا ہے کہ آئی ایم ایف ٹیم کا پہلا تعارفی سیشن نگران وزیرخزانہ اور معاشی ٹیم سے آج ہوگا، یہ میٹینگ قرض کی دوسری قسط کے لیے ہوگی۔
آئی ایم ایف زر مبادلہ کی شرح کے انتظام اور مانیٹری پالیسی کے مؤقف کا جائزہ لے گا جبکہ حکومت چیلنجز کے باوجود پروگرام کے جائزے کو مکمل کرنے کے بارے میں پراعتماد ہے۔
وزارت خزانہ 3 بلین ڈالر پروگرام کے لیے شرائط کو پورا کرنے کے لیے پرامید نظر آ رہی ہے جبکہ اسٹیٹ بینک کے گورنر نے آئی ایم ایف کے اہداف کو پورا کرنے کیلئے تسلی بخش پیش رفت کا عندیہ دیا ہے۔
پاور ڈویژن بھی گردشی قرضوں میں کمی پر آئی ایم ایف کی شرائط پوری کر چکا ہے۔