پاکستان میں غیرقانونی طور پر مقیم افغان باشندوں کی واپسی کا سلسلہ بدستور جاری ہے، 10 دسمبر کو افغانستان واپس لوٹنے والے افغان باشندوں کی مجموعی تعداد 4 لاکھ 23 ہزار سے تجاوز کرگئی۔
تفصیلات کے مطابق 10 دسمبر کو مزید ایک ہزار 930 افغان باشندے اپنے ملک چلے گئے، افغان شہریوں میں 465 مرد، 376 خواتین اور 1089 بچے تھے۔ افغانستان روانگی کے لیے 68 گاڑیوں میں 169 خاندانوں کی اپنے وطن واپسی عمل میں لائی گئی ہے۔
یاد رہے کہ حکومت پاکستان کے اعلان سے قبل بھی غیر قانونی افغان باشندوں کی کثیر تعداد گرفتاری کے ڈر سے پاکستان سے واپس افغانستان جاتی رہی ہے تاہم سرکاری اعداد وشمار کے مطابق افغانستان لوٹنے والے افغان باشندوں کی مجموعی تعداد 4 لاکھ 20 ہزار سے تجاوز کرگئی۔
غیر قانونی افراد کے انخلاء پر عوامی ردعمل
واضح رہے کہ ملک بھر کی طرح کراچی میں بھی غیر قانونی طور پر مقیم افراد کی بڑی تعداد موجود تھی، غیر قانونی غیر ملکیوں کی وجہ سے کراچی میں اسمگلنگ اور بھتہ خوری بہت عام تھی تاہم قابل اطمینان امر یہ ہے کہ حکومتِ پاکستان اور عسکری قیادت کی مشترکہ کاوشوں سے ملک سے غیر قانونی افراد کا انخلاء جاری ہے۔
قانونی افراد کے انخلاء پر رد عمل دیتے ہوئے کراچی کے عوام کا کہنا ہے کہ غیر قانونی طور پر مقیم غیر ملکیوں کی اپنے وطن واپسی کے حکومتی فیصلوں سے ملکی معیشت پر مثبت اثرات مرتب ہو رہے ہیں، آرمی چیف کے مثبت اقدامات سے ڈالر کی قدر میں مسلسل کمی ہو رہی ہے۔
عوامی حلقوں کے مطابق سیاست چمکانے والوں اور ملک دشمن عناصر سے یہ بات ہضم نہیں ہورہی کہ پاکستان ترقی کی راہ پر گامزن ہے، غیر قانونی افراد کی وجہ سے کراچی میں اسمگلنگ بہت عام تھی، اب ان کے انخلاء سے ملک میں مقامی اشیاء کی مانگ میں اضافہ ہوا ہے۔