افغان طالبان نے دارالحکومت کابل کے بازاروں اور مارکیٹوں میں خواتین کو برقع کی ہدایت کے پوسٹر آویزاں کردیئے ہیں۔
غیر ملکی خبر ایجنسی کے مطابق کابل کے بازاروں اور عوامی مقامات پر پوسٹر آویزاں کئے گئے ہیں جن میں خاتون کے عکس کو برقع میں دکھایا گیا ہے۔
ان پوسٹر پر یہ عبارت تحریر ہے کہ شرعی قوانین کے مطابق، مسلمان خواتین کو حجاب کرنا چاہیے۔
افغان طالبان کی وزارت برائے نفاذ شریعت کے ترجمان نے تصدیق کی ہے کہ ان پوسٹرز کو طالبان حکومت کی جانب سے لگائی گئی پابندیوں کی روشنی میں ہی آویزاں کیا گیا ہے۔
مغربی خبر ایجنسیوں نے دعویٰ کیا ہے کہ ان پوسٹرز کے آویزاں کئے جانے سے چند دن پہلے کابل کے ہوٹلوں میں خواتین کو تھپڑ بھی مارے گئے ہیں۔
طالبان کے پہلے دور حکومت مین بھی خواتین پر برقع پہننے اور محرم کے ساتھ گھر سے باہر نکلنے کا حکم تھا۔
کابل میں گزشتہ 20 سال کے دوران خواتین کی جانب سے حجاب کا رواج بڑھا ہے جب کہ دارالحکومت سے باہر خواتین اب بھی روایتی برقع ہی استعمال کرتی ہیں۔
واضح رہے کہ چند روز قبل طالبان نے خواتین کے ملبوسات کی دکانوں پر موجود ڈمیوں کے سر الگ کرنے کا بھی حکم دیا تھا۔
اس کے علاوہ طالبان نے ملک بھر میں خواتین کے حماموں پر بھی پابندی لگائی تھی۔